腊月十六做尾牙

屋企附近有好多潮汕人开铺头做生意，每逢大时大节，佢哋都会用佢哋嘅独特方式搞祭祀。而每到年尾，我都会见到唔少铺头喺门前空地摆张大枱，员工老板坐埋一齐大鱼大肉，呢个，就系好多私家铺头所做嘅“尾牙”嘞。 

做“牙”风俗源于闽南地区，每逢农历初二、十六，就系佢哋拜祭土地公嘅日子。早喺远古时期嘅闽南地区，每年农历二月开耕，近古时代，汉人又以二月初二为土地公公嘅诞日，于是，二月初二做嘅就系一年里头第一次“牙”，故称“头牙”；腊月十六系最后一次，故称“尾牙”。随住各地工商业老板往来频密，粤港澳地区唔少私铺老板都会沿用呢个习俗，可以话，做“牙”呢个习俗，喺广东地区亦颇为流行。 既然“尾牙”有意犒赏工仔，噉“尾牙”餐饭就当然比“头牙”更加高端大气上档次嘞。不过，熟悉习俗嘅老板同工仔都唔会斋被美食冲昏头脑，点解？因为从菜式到餐具嘅摆设，都隐含有“去留密码”———话说当晚饭枱上个鸡头对住边个，嗰个工仔就要被老板炒鱿鱼；而工仔想辞工，就于散席嗰时将筷子倒转放。但，风俗归风俗，系咪真系噉处理，就见仁见智嘞。